Hemen zaude
  • Hasiera
  • Berriak
  • Turismo Enogastronomikoaren I. Kongresuaren ondorioak: helmugek turismoa eta enogastronomia ezkontzea ekarri behar dute, esperientziak zoriontsuak izan daitezen

Berriak

Etiketak:

Turismo Enogastronomikoaren I. Kongresuaren ondorioak: helmugek turismoa eta enogastronomia ezkontzea ekarri behar dute, esperientziak zoriontsuak izan daitezen

2012ko azaroa 13

Helmuga geografikoei esker, ezkondu behar dira turismoa eta elikagaien eremua (kongresuan lortu dugun bezala), zoriona ekarriko diguten esperientzia gogoangarriak sortze aldera. Esaldi horren bidez laburbildu zituen Asunción Fernández-Villaránek, Deustuko Unibertsitateko Gizarte eta Giza Zientzien Fakultateko Zuzendariak, Turismo Enogastronomikoko I. Kongresuan egindako hitzaldiak eta mahai-inguruak. Kongresua azaroaren 5etik 7ra bitartean egin zen, Bilbao Exhibition Centren.

 

Bideo hunkigarri baten bidez, Fernández-Villarán irakasleak azpimarratu zituen zenbait hizlariren baieztapenak; esaterako, Michael Hall ikertzailearenak, munduko sonatuenetako eta Zeelanda Berriko Canterburyko Unibertsitateko Marketineko irakaslearenak; Carlos Chaguacedarenak, Felicidadeko Coca-Cola Institutuko Presidentearenak; Pilar Zorrillarenak, Eusko Jaurlaritzako Turismo eta Merkataritza Saileko Sailburuordearenak; edota José Antonio Rodríguez Ranzenak, Deustuko Unibertsitateko Gizarte eta Giza Zientzien Fakultateko Dekanoarenak.

Ildo horretatik, nabarmentzekoa da zer kontzeptu agertu diren Kongresuan, eta Deustuko Unibertsitateko Gizarte eta Giza Zientzien Fakultateko Zuzendariak honelaxe azpimarratu zituela: gastronomia baliabide bultzatzailea dela, bereziki landa-guneetan, helmuga identifikatu, bereizi eta kokatzen duelako, eta unibertsitateak unibertsitate zerbitzua bete eta eman behar duela, hiru helburu kontuan hartuta:bikaintasunean prestatu, I+G+bko ezagutza sortu eta transferitu eta jendea itzultzea lortu.

Azpimarratutako beste ondorio batzuk honako hauek dira:kalitatearen (osasuna), prezioaren (dirua) eta zerbitzuaren (maitasuna) arteko triangelua da zoriona; esperientzia gogoangarriak subjektiboak dira. Alabaina, ezinbestekoa da industriaren eginkizuna, errazten dituelako esperientziok; izan ere, produktu edo zerbitzu turistikoak diseinatzen dituzte, esperientzia gogoangarriak bihurtu daitezkeenak. Zerbitzu edo produktu turistikoa esperientzia gogoangarri bihurtu dadin, beharrezkoa da diseinua bezeroen eskarian oinarritzea. Beraz, jakintzak transferitu eta trukatu behar ditugu, berrikuntza lortuko badugu.

Eta, azkenik, Asunción Fernández-Villaránek beste iritzi bi nabarmendu zituen:helmugetan, beharrezkoa dela turismo-arloak eta elikagaien eta edarienak batera lan egitea, bai egintzetan, bai estrategian; eta gizarte sareetako, teknologiako eta banaketako berrikuntzek guztiz sendotzen dutela esperientzia, gogoangarria izan dadin.

Hitzaldiak eta mahai-inguruak, formula eraginkorra ezagutzak trukatzeari begira

Hizlarien artean, Marta Santamaría García zegoen, Berrikuntza eta Teknologia Turistikoen Kudeaketarako Estatuko Elkarteko I+G+b Sailekoa, eta hauxe ziurtatu zuen: gastronomia balioesten da gehien gure herritik kanpo, eta ez da ahaztu behar gure herria oso ondo kokatua dagoela turismo-arloan, bere garapen teknologikoagatik. Hori dela eta, funtsezkoak dira gure arteko ezagutza-transferentzia eta kanpokoekikoa. Segitur-eko arduradunak dio nazioartekotu behar dugula kontu horretan ere, eta oso mezu argia bidali zien pyme-ei: beharrezkoa da produktu errentagarri bat aukeratzea, arloko eragile guztiekin harremanetan egotea -lehiakideak barne- eta plangintzan argi bai argi izatea zenbat kostako den proiektua.

Ekitaldi gastronomikoak izan ziren mahai-inguruetako baten hizpide, non Santiago Vivanco, Iñaki Gorrotxategi eta Karolina Buckkowaska adituek ahaleginak egin baitzituzten kontzeptu horren definizio komun bat topatzeko; turismo-baliabide gisa, arrakastatsua izan dadin oinarriak ezartzeko; helmuga koherenteak ekartzeko; eta izaera eraikitzeko, eragile guztien baterako lanean oinarriturik. Iñaki Gorrotxategi Tolosako Konfiteri Museoko Arduraduna da; Santiago Vivanco, Dinastía Vivanco Fundazioko Ardoaren Kulturako Museoko Zuzendaria; eta Karolina Buckkowaska, Poznan-eko Unibertsitateko ikertzaile eta irakaslea.

Dinastía Vivanco Fundazioko Ardoaren Kulturako Museoa zentro aitzindaria da, eta TME-NBEk munduko ardo-museo hoberentzat hartu du; gainera, egun, Errioxako lehen helmuga turistikoa da, 120.000 mila bisitari baino gehiago baititu urtero, eta horietako % 20 atzerritarrak dira. Bada, museo horretako arduradun Santiago Vivancok biziki azpimarratu zuen zer ikuspuntu unibertsal eskaintzen duten instalazio horiek, ardoaren kultura hedatzeko. Berak dioenez, ardoarekiko grina da traineruaren branka, eta horrek eraman gaitu interaktibo konplexu bat eraikitzera, non hainbat eta hainbat kontu ditugun: mahastiak, upategiak, dastatzeko ikastaroak, artelanak, nazioarteko dokumentazio-zentro bat, tailerrak -umeentzat ere- eta gure argitaletxe propioa.

Beste alde batetik, Iñaki Gorrotxategik azpimarratu zuen ze garrantzitsua den museoa lotzea tokiko industria bizi eta esanguratsu batekin: konfiteriarekin. Hori dela eta, euren famili negozioa, 1680an sortua, urtero-urtero saiatzen da zerbait berria eskaintzen, hau da, produktu moderno eta erakargarriak. Karolina Buckkowaskak agerian utzi zuen zer emaitza izan duten bere souvenir ikerketek eta zergatik erosten diren produktu turistiko horiek.

Gizarte-sareei buruzko mahai-inguru batean, online-ko marketinaren arloko esperientzia handiko profesionalek osatuan, nabarmendu zen beharrezkoa dela esparru enogastronomikoa berritzea gizarte-sareen bidez. Juan Carlos Milena, Joantxo Llantada eta Eric Wolf hizlariek adoretu zuten egungo teknologiak erabiltzera, berez kalean gertatzen diren prozesuak ugaltzen dituztelako; esaterako, bidaia bat egiteko gomendioak, iritziak bilatzea edo inspirazioa. Juan Carlos Milena minube.com-eko komunikazio-arduraduna da; Joantxo Llantada, Valentziako Erkidegoko turismo-sustapenerako saileko arduraduna; eta Eric Wolf, World Food Travel Association-eko presidentea.

Turismoaren zerbitzura dagoen teknologiaz hitz egiteko, beste mahai-inguru bat izan zen: ”La búsqueda de la excelencia a través de la innovación”.Tecnaliako Merkataritzako Gerente Jesús Herrerok azaldu zuen baliabide teknologiko berritzaileak lagungarriak izan daitezkeela kontsumitzaileak gozatu dezan horien bidez. Iñaki del Ríok, Berrikuntzako Ibermatikako Institutuko Zuzendariak, Mirac proiektua ere agertu zuen, Goi Sukaldaritza Errestauratzeko Berrikuntza Eredua.

Horrez gain, turismo-arloko ekintza sortzaile eta berritzaileak garatu dituzten zenbait enpresa turistikok tailer batzuk gauzatu zituzten, hitz egiteko eta ezagutzak trukatzeko; horretarako, bi saio izan ziren, “Turismo enogastronomikoa, esperientzia gogoangarri gisa” hizpide izan zutenak. Mahai-inguruan, argi geratu zen zerbitzuak berritzeko eta diseinatzeko eskaintza oso faktore komuna dela agertutako proiektuetan; esaterako, ardoan, txirringa elektrikoetan, miniaturako sukaldaritzan, kruzeroetan, paradoreetan eta gida turistikoetan.

Desing Service Thinking-aren gakoez aritu zen Mark Stickdorn, School of Tourism Business Studies at Management Center Insnsbruck-eko ikertzaile eta irakaslea. Desing Service Thinking horren arabera, helmuga arrakastatsua lortzeko, ezinbestekoa da turismoaren arloko zerbitzuak diseinatzea, eta ikuspuntua diziplina artekoa eta mentalitatea aldatzeko izan behar da. Aztertutako kasuen artean, nabarmentzekoa da Marqués de Riscalen Ardoaren Hiriari buruzkoa, bertako presidente Alejandro Aznarrek azaldu zuena. Kasu hori upategia kudeatzeko eredu berri baten eskutik heldu da, eta bere ezaugarria da publikoari eta bezero izan daitezkeenei zabaltzea, zenbait zerbitzu berri jarrita. Proiektua gauzatze aldera, hotel bat integratu dute upategian, hiru zerbitzu erakargarri dituena: ardoterapia-spa, jatetxe gastronomikoa eta  bisita gidatuak. Hori guztia sartua dago marketin-proiektu batean, Frank O. Gehry-ren arkitekturaren bitartez erlazionatuan.

Mugikortasun iraunkorreko eta ekoturismoko filosofia kontuan hartuta, Burricleta enpresaren jarduera da txirringa elektrikoak alokatu eta saltzea eta esperientzia turistikoak eskaintzea oso turistikoa ez den ingurunean, eta gps-a da funtsezko bereizgarria, audio formatuan tokiko hainbat informazio ematen baitu.

Hauexek ere izan ziren partaide: Darran Willianson, miniaturako sukaldaritza berrian sukaldari aditua; Xabier Bennasar, Oceania Cruises-eko Espainiako eta Portugaleko Salmentetako Zuzendaria; Juan Manuel Lavín, Arabako Errioxako Ardoaren Ibilbideko Presidentea; Paradoreak Ustiatzeko Zuzendari Sandra Gutiérrez de Terán. Paradoreak, berez, helmuga dira eta inguruneko gastronomia eta kultura gastronomikoa bultzatzen dute, eta euren fakturazioaren ehuneko berrogeita hamar erlazionatua dago gastronomiarekin; Everest Fundazioko Javier Atienzo, hitz egin zuena zelan bilakatu diren gida turistikoak eta zer eginkizun izan duten turismo gastronomikoa hedatzen; eta Hervé Bouyrie, Las Landasko Turismo Saileko Batzordeko presidentea, azaldu zuena zer tresna erabiltzen diren eta nola ikusten duten turismoa euren herrialdean.

Utzi erantzuna

Zure helbide elektronikoa ez da argitaratuko. Beharrezko eremuak * markatuta daude

*